Tíminn og vatnið
500 orð sem útskýra verkefnið

Kringlureiturinn er einn fjölmennasti staðurinn á höfuðborgarsvæðinu, sem þúsundir manna heimsækja daglega. Hann er staðsettur við tvær stærstu umferðagötur landsins, Kringlumýrarbraut og Miklubraut sem gerir reitinn einstaklega miðsvæðis á höfuðborgarsvæðinu. Svæðið hefur því góða möguleika fyrir framtíðina einnig hvað varðar tengingu við umhverfið í kring, skóla, atvinnu, íbúðarhverfi, heilbrigðisstofnanir og miðbæinn.  

Í dag er Kringlureiturinn ekki í takt við aðstæður í nútíma samfélagi þegar kemur að umhverfissjónarmiðum en var hann hannaður fyrir einkabílinn. Reiturinn er einangruð eyja umvafin umferð þar sem tengingin við önnur hverfi er lítil sem engin. Mismunun er á gangandi vegfarendum og einkabílnum á svæðinu þar sem allar samgöngur eru hugsaðar út frá 
einkabílnum og í raun ekki gert ráð fyrir gangandi vegfarendum um svæðið sem myndar mikið ójafnvægi.  

Í okkar verkefni sjáum við fyrir okkur að Kringlureitur verði kolefnislaust svæði með því að viðhalda eins miklum gróðri og hægt er og endurheimta votlendin, með endurnýtingu regnvatns,  sem einu sinni voru partur af svæðinu. Þau binda kolefnin úr andrúmsloftinu og mengunina sem kemur frá umferðinni í kring, sporna gegn losun gróðurhúsalofttegunda ásamt því viðhalda líffræðilegum fjölbreytileika. 

Við viljum nýta sem flestar núverandi byggingar á svæðinu en þær sem þarf nauðsynlega að rífa niður er mikilvægt að endurvinna þau efni sem falla frá. Nýbyggingarnar verða úr umhverfisvænum efnum sem fanga koltvísýring úr andrúmsloftinu. Þær verða menningalega sjálfbærar og með sveigjanleg rými sem geta lagað sig að breyttum aðstæðum, sem dæmi má nefna bílakjallarann og skrifstofubyggingar.  

Við höfum íbúðarhverfið lágreist til að sólarljósið nái að flæða sem mest um svæðið og inn í íbúðir svo að allir fái nægt sólarljós. Þannig náum við fram heilbrigðu umhverfi og samfélagi, einnig með gróðursælum görðum þar sem íbúar geta ræktað sinn eigin mat og tengst náttúrunni. Við viljum búa til sveigjanleg almennings- og einkarými með tilliti til vinda, sólarljóss og skuggamyndunar. Í skipulagi íbúðarhverfisins er gert ráð fyrir að fyrsta hæðin sé fyrir verslanir og veitingar ásamt leikskóla, hæðirnar fyrir ofan eru fyrir íbúðir sem eru allt frá stúdíó íbúðum yfir í stærri fjölskyldu íbúðir. Með þessu viljum við koma í veg fyrir áberandi stéttaskiptingu og leggja áherslu á blandaða íbúðarbyggð. Ásamt því að anna eftirspurnum á íbúðum fyrir stærri fjölskyldur sem hingað til hafa þurft að flytja úr hverfinu. Gert er ráð fyrir að listaháskóli verði í gamla Moggahúsinu og í nýbyggingu í kring með góðri tengingu við Borgarleikhúsið. 

Kringlureiturinn er líklega einn miðlægasti reitur höfuðborgarsvæðisins þegar kemur að samgöngum og samgöngutengingum. Þar munu tvær stöðvar Borgarlínu liggja, önnur tengir svæðið við efri hverfi Reykjavíkur og Mosfellsbæ en hin við Kópavog, Garðabæ og Hafnarfjörð. Sem auðveldar íbúum að lifa bíllausum lífstíl. 

Við viljum minnka og hægja á umferð í kring um svæðið, annars vegar með því að setja gatnamót Kringlumýrarbrautar og Miklubrautar í stokk og þar með minnkum við hávaða og svifryksmengun til muna auk þess sem hverfið verður öruggara fyrir íbúa sérstaklega börn sem sækja í skóla eða tómstundir í nærliggjandi hverfum. Hinsvegar með því að lækka hámarkshraða niður í 30 km/h og göturnar í íbúðarhverfinu verða vistgötur með 10 km/h hámarkshraða. Vistgöturnar verða sameiginlegt rými gangandi, hjólandi og akandi vegfarenda, ekki er gert ráð fyrir mörgum bílastæðum á götunum en lögð er áhersla á „drop off zone.“ Næg stæði verða í bílakjallaranum sem er undir hluta af svæðinu.  

Við viljum með þessari hugmynd hvetja borgina og vonandi allt landið til að gera drastískar breytingar í átt að heilbrigðara samfélagi og hreinna umhverfi.